الفانيليا و الفراولة

اشترى عربية جديدة وكان فرحان جدا بيها وكان بيحب آيس كريم الفراولة والفانيليا جدا

وكان عنده عادة انه بعد مايخلص الشغل وهوه مروح البيت انه يشتري آيس كريم فراولة أو فانيليا

فكان بيركن العربية وينزل يشتري الآيس كريم من السوبر ماركت ويطلع تاني يركبها

المهم لفت نظره انه اليوم اللي بيشتري فيه آيس كريم فانيليا ويطلع عشان يشغل العربية ..تقوم ماتشتغلش بسرعة
واليوم اللي يشتري فيه آيس كريم فراولة .. ويطلع يشغل العربية ..تشتغل بسرعة

الراجل زعل فعلا لأنه لسه شاري العربية من قريب فراح للشركة اللي اشترى منها العربية

الراجل راح للشركة وحكى لهم الموضوع كله وقصة الفانيليا والفراولة قامت الشركة ارسلت مندوب من عندها يرافق الراجل ده في أي تحرك ليه بالعربية

وفعلا كان كلام الراجل صحيح فاليوم اللي يشتري فيه آيس كريم فانيليا العربية ماتشتغلش بسرعة واليوم اللي يشتري فيه آيس كريم فراولة العربية تشتغل بسرعة

وبعد البحث والتدقيق اكتشفوا الحقيقة

آيس كريم الفانيليا بجوار بوابة الدخول في السوبر ماركت يعني الراجل بيدخل يشتريه ويخرج على طول
أما آيس كريم الفراولة فإنه بعيد عن بوابة الدخول للسوبر ماركت يعني في آخر المحل فالراجل على ما بيروح وييجي بيكون خد شوية وقت

لما الراجل بيشتري الفانيليا ويخرج على طول بتكون العربية لسه سخنة (حرارتها مرتفعة) ولما بيشتري الفراولة ويخرج بتكون العربية حرارتها انخفضت وعلى هذا كان هذا عيبا في تصنيع هذه السيارة حيث انها بتشتغل وهيه باردة يعني وحرارة الجو منخفضة او عادية بسرعة اكبر من ودرجة حرارة الجو مرتفعة والجو حر

الــــــشـــــــاهــــــــد

انه الراجل لما راح الشركة المصنعة للعربية الموظفين اللي هناك عاملوه معاملة كويسة وبعته معاه واحد يشوف ايه الحكاية
وقاموا بحل المشكلة في النهاية

أما لو كان في بلد من بلادنا العربية فكان الراجل ده يا إما انه هيتشتم ويطرد يا إما انه ماحدش هيعبره من الأساس

أرض الهايكستب شاهد عيان

بصراحة كده أنا كل ما بفتكر المعتقلين وخصوص من الإخوان اللي بيتحاكموا محاكمة عسكرية بسأل نفسي

النظام الفاسد الموجود في مصر ألا يعلم بأنه هناك يوم سيأتي ويحاسبهم فيه الله

انا فعلا نفسي أدخل جوه العقليات الغريبة والعجيبة دي وأعرف هوه ازاي وليه بيعمل كده

مثلا القاضي الظالم اللي في المحاكمة العسكرية الجلسة الماضية الراجل ده بيفكر ازاي مش عارف انه هييجي يوم ويموت ولا ايه الحكاية؟؟

الناس اللي بتسرق أموال الشعب مش خايفة من ربنا ليه انا مش عارف؟؟!!

انا من ضمن الحاجات اللي بتوجعلي دماغي وبتزعلني جدا جدا : أبناء الاخوان المعتقلين في محموعة منهم انا متابع أخبارهم عن قرب لكن الجزء الآخر منهم انا معلوماتي عنه عامة

دعائي لهم أن يصبرهم الله في موقفهم الذي لايحسدون عليه بالتأكيد وان شاء الله حقهم عمره مايضيع أبدا أبدا

بكرة 15/7 الجلسة الثالثة للمحاكمة العسكرية بالهايكستب وان شاء الله كله خير

أشعر الآن أنني وحيد

الى أصدقائي الذين تخرجوا من الكلية لكم سنشتاق لكم ولكم سنبكي على فراقكم

أتذكر الآن اليوم الذي تقابلنا فيه منذ سنين وأرى كم هي الأيام قصيرة وكم تمر سريعة

أملي أن نبقى على اتصال وثيق وأن لا تنسينا الأيام ذكرى طيبة عشناها معا يوما ما

أنا الآن أتخبل أول يوم لي في الكلية العام القادم وأنا على يقين من أني لن أراهم مرة أخرى داخل مباني الكلية

الى كل الخريجين لا تنسوا اصحابكم داخل الكلية من الدعاء والنصح لما سيقابلهم في الحياة مستقبلا

أدعو الله أن توفقوا في حياتكم الدنيا وفي آخراتكم

أين الحب ؟؟

كنت انا وصاحبي عبدالله بنعمل عمرة من فترة كده

المهم فوجئت بأني كل مأروح مكان سواء في الحرم أو في أي مكان في مكة أو حتى مدينة جدة

ألاقي راجل وزوجته ( مصريين ) بيتخانقوا و بصوت عالي , المهم انا قلت الموضوع عادي وأكيد في أزواج كتير بيتخانقوا مع بعض

وقلت أقول لصاحبي على اللي انا شايفه يمكن أكون غلطان المهم صاحبي اندهش من انه انا كمان الموضوع لفت انتباهي وقال لي انه الموضوع لفت انتباهه هوه كمان

وقلت يمكن احنا بنيالغ ووحاولنا نشوف باقي الناس الموجودة حوالينا أيا كانوا واكتشفنا انه المصريين همه الوحيدين اللي بيعملوا كده
وان باقي الجنسيات بيتكلموا مع بعض بصوت منخفض جدا جدا

ياترى ايه السبب!!؟؟

وهل فعلا المتزوجين المصريين علاقتهم ببعض بتكون كويسة في أول فترة الزواج وبعد كده كل شئ بيتغير
وايه حكاية الصوت العالي دي أنا فعلا الموضوع ده أزعجني جدا لأن مفيش حد بيعمل كده غيرنا احنا المصريين

انا والله مش قصدي اننا وحشين ولا حاجة بس أنا بحاول أعرف حقيقة المشكلة يمكن نعرف نحلها سوا

اوعى تكون راجل عادي

شايفين اللي في الصورة فوق - ده راجل مش عادي
تعالوا نحكي قصة الراجل العادي

أمه كانت نفسها تولده في المستشفى لكنه اتولد في البيت عادي زي ما كل الناس بتتولد
عاش طفولة عادية جدا زي أي طفل تاني ومع انه كان عنده مواهب كتيرة إلا انه ماعملش بيها حاجة

وكان اول يوم في المدرسة وعادي جدا دخل المدرسة الابتدائي زي أي طفل تاني ولما عرف انه في حاجة اسمها منافسة ودرجات وتفوق حب يشد حيله بس ماعرفش

وكان طالب عادي واتخرج من الابتدائية عادي جدا ودخل مدرسة اعدادي عادية

ولما جت الثانوية العامة قال لنفسه دي مرحلة حاسمة في حياة الانسان وهـتحدد جزء لا بأس به من حياته وانه لازم يشد حيله ويجيب درجات كويسة ويتفوق ويذاكر كويس

بس للأسف جاب درجات عادية في الثانوية العامة ودخل كلية عادية بعد ماكان بيحلم بكلية تانية خالص عادي زي حد

وفي الكلية قال لنفسه ممكن أشد حيلي وأطلع في الآخر معيد بس للأسف جاب درجات عادية واتخرج من الكلية بمجموع عادي زي أي خريج تاني

وبعد كده اشتغل في وظيفة عادية وبقى ياخد مرتب عادي واتجوز جوازة عادية وأبنائه كانوا عاديين جدا

ولما مات اتكتب على قبره راجل عادي

نصيحة : اوعى تعيش حياتك زي الراجل العادي

انته ليه عملت كده؟؟

كنت في رحلة الى احدى القرى المصرية بمحافظة القليوبية وعندما أذن لصلاة المغرب ذهبت انا وصديق لي الى المسجد لأداء الصلاة

كانت المفاجأة : المؤذن ينام على بطنه داخل المسجد ويؤدي الأذان والمايكروفون أمامه

أصبت بحالة من التشنج اللا إرادي فلم أدر ماذا أفعل ... وانتظرنا حتى انتهى من الاذان

وحينها سألناه : انته ليه عملت كده ؟؟

أجاب : أصل المايكروفون بيكهرب ياأستاذ

لهذا السبب بدأت التدوين

بلدان تمزق وبلدان أخرى يحارب بعضها بعضا و...و....

فهل سيأتي يوم أرى فيه بلدي الحبيبة أكثر دمارا وسوءا مما هي عليه الآن

وتنبهت حينها الى ان الكتابة و( التدوين ) قد يكونان من الاسباب التي تساهم وبشكل كبير في الاصلاح

اتمنى فعلا ان ارى بلدي حرة من أيدي العابثين والمخربين أيا كانوا

اتمنى ان نعيش حياة كريمة تعطي للانسان حقوقه كاملة دون نقص

اتمنى ان تكون بلدي الحبيبة في مقدمة الأمم وليس في مؤخرتها
( كما هي الان )

اتمنى ..............واتمنى ..................واتمنى.............

لكم هو سهل التمني .... لكن الصعوبة الحقيقية تكمن في تحقيق الأمنية

لهذا السبب فقط بدأت التدوين